పులివెందులలో హైటెన్షన్.. అర్థరాత్రి మూడు కార్లు, 11 ద్విచక్ర వాహనాలు దగ్ధం

కడప జిల్లా పులివెందులలో మున్సిపల్ ఎన్నికల పోలింగ్‌కు కొన్ని గంటల ముందు అర్ధరాత్రి చోటుచేసుకున్న అగ్నిప్రమాద ఘటన తీవ్ర చర్చనీయాంశంగా మారింది. శిల్పారామం సమీపంలోని ఓ పొలం వద్ద నిలిపి ఉంచిన వాహనాలకు గుర్తు తెలియని వ్యక్తులు నిప్పంటించారు. ఈ ఘటనలో మూడు కార్లు, 11 ద్విచక్ర వాహనాలు, ఒక ట్రాక్టర్ ట్రాలీకి మంటలు అంటుకున్నాయి. వీటిలో సుమారు ఎనిమిది వాహనాలు పూర్తిగా దగ్ధమయ్యాయి.

ఉలిమెల గ్రామానికి చెందిన మధుసూదన్‌రెడ్డికి చెందిన వ్యవసాయ క్షేత్రంలోని నివాసం వద్ద ఈ వాహనాలను నిలిపి ఉంచారు. అర్ధరాత్రి సమయంలో ఒక్కసారిగా మంటలు చెలరేగడంతో స్థానికులు అప్రమత్తమై అగ్నిమాపక సిబ్బందికి సమాచారం అందించారు. ఫైర్ సిబ్బంది ఘటనా స్థలానికి చేరుకుని మంటలను అదుపులోకి తీసుకొచ్చారు. అయితే అప్పటికే భారీగా ఆస్తి నష్టం జరిగినట్లు తెలుస్తోంది.