రాజేశ్ ఖన్నాతో సంబంధంపై అనిత అద్వానీకి షాక్.. 'లగ్జరీ లిటిగేషన్' అంటూ సుప్రీంకోర్టు కీలక వ్యాఖ్యలు!

దివంగత బాలీవుడ్‌ దిగ్గజ నటుడు రాజేశ్ ఖన్నా వ్యక్తిగత జీవితానికి సంబంధించిన వివాదం మరోసారి హాట్ టాపిక్ గా మారింది. ఆయనతో తనకున్న సంబంధాన్ని వివాహంగా గుర్తించాలని కోరుతూ మాజీ నటి అనిత అద్వానీ చేసిన న్యాయపోరాటానికి సుప్రీంకోర్టులోనూ ఎదురుదెబ్బ తగిలింది. ఆమె దాఖలు చేసిన పిటిషన్‌ను విచారించేందుకు తగిన కారణాలు లేవని అత్యున్నత న్యాయస్థానం తోసిపుచ్చింది. ఈ కేసును 'లగ్జరీ లిటిగేషన్'గా అభివర్ణించింది. దీంతో ఎన్నో ఏళ్లుగా కొనసాగుతున్న ఈ వివాదం మరోసారి చర్చనీయాంశమైంది.

జస్టిస్ ఎం.ఎం. సుందరేశ్, జస్టిస్ ప్రసన్న బి. వరాలే ధర్మాసనం ఈ పిటిషన్‌ను విచారించింది. తన సివిల్ కేసులో కోరుతున్నది కేవలం గౌరవమేనని అనిత తరఫు న్యాయవాది కోర్టుకు వివరించారు. అయితే, ఈ పిటిషన్‌ను స్వీకరించేందుకు తగిన ఆధారాలు లేవని ధర్మాసనం స్పష్టం చేసింది. బాంబే హైకోర్టు ఇచ్చిన తీర్పును సవాల్ చేస్తూ దాఖలైన అప్పీల్‌ను కొట్టివేసింది.