రైతు ఏడాది ఆదాయం ఐటీ ఎంప్లాయి నెల జీతం కంటే తక్కువే:  కేంద్రమంత్రి బండి సంజయ్

హైదరాబాద్: రైతు ఏడాది ఆదాయం ఐటీ ఎంప్లాయి నెల జీతంకంటే తక్కువేనని కేంద్ర మంత్రి బండి సంజయ్ అన్నారు. రైతుల అభివృద్ధి కోసం మోడీ ప్రభుత్వం అనేక సంక్షేమ పథకాలను అమలు చేస్తోందని తెలిపారు. శుక్రవారం (అక్టోబర్ 30) హైదరాబాద్ రాజేంద్రనగర్‎లోని వ్యవసాయ పరిశోధన కేంద్రంలో నిర్వహించిన పీఎం కిసాన్ సమ్మాన్ నిధి విడుదల కార్యక్రమంలో బండి సంజయ్ పాల్గొన్నారు. ఈ సందర్భంగా ఆయన మాట్లాడుతూ.. దేశానికి జై జవాన్, జై కిసాన్ రెండు కళ్లని అభివర్ణించారు.

ప్రధాని మోడీకి సైనికులు, రైతులు అంటే ఎంతో ఇష్టమన్నారు. 2014తో పోలిస్తే వ్యవసాయ బడ్జెట్ 5 రెట్లు పెంచామని.. రైతును రారాజు చేయడమే మోడీ లక్ష్యమని పేర్కొన్నారు. అందులో భాగంగానే రైతుల ఖాతాల్లో పీఎం కిసాన్ సమ్మాన్ నిధిని జమ చేస్తున్నామన్నారు. ఇప్పటి వరకు 23 విడతలుగా రూ.4 లక్షల 47 వేల కోట్లు రైతుల ఖాతాల్లో వేశామన్నారు. కిసాన్ సమ్మాన్ నిధి సొమ్మును 92 శాతం మంది రైతులు వ్యవసాయానికే ఖర్చు చేస్తున్నారని తద్వారా 85 శాతం మంది రైతుల ఆదాయం పెరిగిందన్నారు.