రైతును కూలీగా మార్చిన కాంగ్రెస్‌

రాజాపేట, నవంబర్‌ 3: ఒకప్పుడు నలుగురికి అన్నం పెట్టిన రైతన్న.. నేడు తన కుటుంబాన్ని సాకడానికి రోజువారీ కూలీగా మారాడు. ఆరుగాలం కష్టపడి సాగు చేసిన పంట కండ్లముందే ఎండిపోవడంతో కన్నీటి పర్యంతమయ్యాడు. వ్యవసాయమే జీవనాధారంగా బతికిన అన్నదాతకు ఇప్పుడు కూలి పనులే దికయ్యాయి. యాదాద్రి భువనగిరి జిల్లా రాజాపేట మండలం కొండ్రెడ్డిచెరువు గ్రామానికి చెందిన నీల లక్ష్మీనారాయణకు ఐదెకరాల భూమి ఉన్నది. ఒక బోరు ఆధారంగా మూడు ఎకరాల్లో వరి సాగుచేశాడు.

తీరా పంట పొట్ట దశకు చేరే సమయంలో విద్యుత్తు కోతలు, వర్షాభావ పరిస్థితులతో నీరందక పంట మొత్తం ఎండిపోయింది. పెట్టిన పెట్టుబడి బూడిద కావడంతో దికుతోచని స్థితిలో పడిపోయాడు. వ్యవసాయానికి తోడుగా ఉన్న నాలుగు పశువులకు నీరు, గ్రాసం అందించలేక వాటిని సైతం అమ్ముకున్నాడు. ఓ వైపు పంట నష్టం.. మరోవైపు కుటుంబ పోషణ భారంగా కావడంతో చేసేదేమీ లేక రోజువారీ కూలీగా మారాడు. ఒకప్పుడు తన పొలంలో వ్యవసాయం చేసిన చేతులే.. నేడు కూలి పనులు చేస్తున్నాయి. వడ్లు పండించే రైతన్నే పట్టెడన్నం కోసం కష్టపడాల్సిన దుస్థితి రావడం పలువురిని కలచివేస్తున్నది.