RTC Conductors | డ్రైవర్లు రాలేదు.. మీరు సెలవు పెట్టి వెళ్లండి.. కండక్టర్లు విధుల్లోకి రాకుండా అడ్డుకున్న కుషాయిగూడ ఆర్టీసీ అధికారులు!

RTC Conductors | హైదరాబాద్‌ పరిధిలోని కుషాయిగూడ ఆర్టీసీ డిపో వద్ద బుధవారం స్వల్ప ఉద్రిక్తత నెలకొంది. డిపో వద్దకు వచ్చిన మహిళా కండక్టర్లను ఆర్టీసీ అధికారులు విధుల్లోకి అనుమతించలేదు. ఆర్టీసీ డ్రైవర్లు రాలేదు.. మీరు సెలవు పెట్టి వెళ్లండి అంటూ వారిని అటెండెన్స్ రిజిస్టర్‌లో సంతకాలు చేయనివ్వకుండా అడ్డుకున్నారు. ఈ ఘటనపై మహిళా కండక్టర్లు ఆవేదన వ్యక్తం చేశారు. బస్సులకు కేటాయించిన డ్రైవర్లు విధులకు రాకపోతే తాము సెలవు పెట్టి వెళ్లాలని అధికారులు చెబుతున్నారని ఆరోపించారు. ఈ మేరకు విధుల్లోకి అనుమతించాలని డిపో ఎదుటే ఎదురుచూస్తున్నారు.

ఉదయం నుంచే డిపోకు చేరుకున్నప్పటికీ అటెండెన్స్‌ రిజిస్టర్‌లో సంతకాలు చేయనివ్వకుండా అధికారులు అడ్డుకుంటున్నారని మహిళా కండక్టర్లు తెలిపారు. డ్రైవర్లు విధులకు హాజరుకాని సందర్భాల్లో తమను సెలవు పెట్టాలని ఒత్తిడి చేస్తున్నారని పేర్కొన్నారు. తాము విధులకు సిద్ధంగా ఉన్నప్పటికీ అనవసరంగా సెలవు తీసుకుంటే జీతంపై ప్రభావం పడుతుందేమోనని ఆందోళన వ్యక్తం చేశారు.