సాగునీరివ్వాలని కోరితే బెదిరింపులా?

జయశంకర్‌ భూపాలపల్లి, నవంబర్‌ 10 (నమస్తే తెలంగాణ): పంటలకు సాగునీరందించాలని రైతులు కోరితే క్రిమినల్‌ కేసులు పెడుతామని భూపాలపల్లి ఎమ్మెల్యే గండ్ర సత్యనారాయణరావు భయభ్రాంతులకు గురిచేయడం ఏమిటని మాజీ ఎమ్మెల్యే గండ్ర వెంకటరమణారెడ్డి ప్రశ్నించారు. మంథనిలో 5 మండలాలను కరువు ప్రాంతాలుగా ప్రకటిస్తే, భూపాలపల్లిలో ఒక్క మండలాన్ని మాత్రమే ప్రకటించడంపై ఎమ్మెల్యే నోరు మెదపకపోగా, కేసుల పేరుతో రైతులను బెదిరించడం సరికాదని అన్నారు.

మంగళవారం ఆయన భూపాలపల్లిలో మీడియాతో మాట్లాడారు. ఎన్నికల సమయంలో ప్రజలకిచ్చిన హామీలను అమలు చేయకుండా రేవంత్‌రెడ్డి తప్పించుకొని తిరుగుతున్నాడని విమర్శించారు. మూడేండ్ల కాంగ్రెస్‌ పాలనలో బీఆర్‌ఎస్‌ ప్రభుత్వాన్ని విమర్శించడమే తప్ప ప్రజలకు చేసిందేమీ లేదని మండిపడ్డారు. వృద్ధులు, ఒంటరి మహిళలు, వితంతువులు, దివ్యాంగులకు పింఛన్ల విషయంలో ఇప్పటికీ స్పష్టత లేదని ఆరోపించారు. మూడేండ్లుగా కొత్త పింఛన్లు మంజూరు చేయకపోవడం ప్రభుత్వ నిర్లక్ష్యానికి నిదర్శనమని మండిపడ్డారు.