Sabarimala: శరణుఘోషకు సర్వం సిద్ధం.. అందుబాటులోకి శబరి పోర్టల్, చాట్‌బాట్

పథనంథిట్ట: అయ్యప్ప భక్తులు చేపట్టే మండలం-మకరవిలక్కు యాత్రల కాలం మరికొద్దిరోజుల్లో మొదలు కానుండటంతో కేరళం సర్కారు శబరిమలలో పూర్తిస్థాయిలో ఏర్పాట్లు చేస్తోంది. అత్యవసర సేవలు, రియల్‌-టైం సమాచారం కోసం ఈసారి శబరి పోర్టల్‌ను, వాట్సప్‌ చాట్‌బాట్‌ను ప్రవేశపెడుతున్నారు. యాత్రికుల సంబంధిత సేవలు క్రమబద్ధీకరించి, ప్రభుత్వ శాఖల మధ్య సమన్వయం మెరుగుపరచడానికి జిల్లా యంత్రాంగం వీటిని తీర్చిదిద్దింది. దర్శనం, రవాణా, వసతి, ఆరోగ్య రక్షణ, అత్యవసర సేవలు పొందడానికే కాకుండా.. పంబ, నీలక్కల్, సన్నిధానంలలో సదుపాయాలను వినియోగించుకునేందుకు పోర్టల్‌ వీలు కల్పిస్తుందని అధికార వర్గాలు తెలిపాయి.

వేర్వేరు కార్యాలయాలకు వెళ్లాల్సిన అవసరం లేకుండా సేవలన్నీ ఒకే వేదిక ద్వారా అందుతాయని చెప్పాయి. ఎవరైనా తప్పిపోయినా, ఏవైనా వస్తువులు పోయినా దీనిద్వారా అధికారుల దృష్టికి తీసుకువెళ్లవచ్చు. అవి ఆటోమేటిగ్గా పోలీసు కంట్రోల్‌రూంకు చేరుతాయి. దానిపై తీసుకున్న చర్యల్ని భక్తులకు వాట్సప్‌ ద్వారా తెలియపరుస్తుంటారు. తాగునీరు, మరుగుదొడ్లు, వైద్య కేంద్రాలు, పార్కింగ్‌ సదుపాయాలు, విశ్రాంతి భవనాలు, ఏటీఎంలు వంటివి ఎక్కడున్నాయో పోర్టల్‌లో తెలుస్తుంది. గూగుల్‌ మ్యాపుల సాయంతో వీటిని సులభంగా చేరుకోవచ్చు. రైళ్లు, బస్సుల సమాచారం సైతం పొందవచ్చు. ఏయే వస్తువులకు అధికారిక ధరలు ఎంత అనేది వేర్వేరు భాషల్లో కనిపిస్తుంది.