సమష్టి పోరాటమే శరణ్యం

సమాజంలో సైన్స్‌ పాత్రను చాటిచెప్పడం, శాస్త్రీయ పురోగతి ద్వారా శాంతి, సుస్థిరాభివృద్ధిని సాధించడం కోసం ‘యునెస్కో’ ఏటా నవంబర్‌ 10న ప్రపంచ వైజ్ఞానిక దినోత్సవాన్ని నిర్వహిస్తోంది. అందులో భాగంగా ఈసారి ‘సైన్స్‌ దౌత్యం ద్వారా ఉమ్మడి వేదిక ఏర్పాటు’ అనే ఇతివృత్తాన్ని ఎంచుకుంది. అంటే- వాతావరణ మార్పులు వంటి ఉమ్మడి సవాళ్లను అధిగమించడానికి ప్రపంచ దేశాలు రాజకీయ విభేదాలను పక్కనపెట్టి ఏకతాటిపైకి రావడానికి సైన్స్‌ దౌత్యం ఎలా దోహదపడుతుందో ఇది తెలియజేస్తుంది. ఆ క్రమంలోనే అంతర్జాతీయ శాస్త్రీయ సహకారం, విజ్ఞాన ఆధారిత చర్చల ప్రాధాన్యాన్నీ చాటిచెబుతుంది.

నేడు ప్రపంచం ఎదుర్కొంటున్న అతిపెద్ద సమస్య- వాతావరణ మార్పులకు కారణమవుతున్న కర్బన ఉద్గారాల్లో సగం ధనిక దేశాలు వెదజల్లుతుంటే, ఆ దుష్పరిణామాలను పేద, వర్ధమాన దేశాలే ఎక్కువగా భరించాల్సి రావడం! శతాబ్ద కాలంగా వెలువడుతున్న మొత్తం గ్రీన్‌హౌస్‌ వాయువుల్లో అగ్రభాగం అమెరికాదే. 20శాతానికి పైగా కార్బన్‌ డయాక్సైడ్‌ను వెదజల్లి భూతాపం పెరగడానికి ముఖ్య కారణమైందా దేశం. ఇలా ప్రపంచానికి అమెరికా సుమారు పది లక్షల కోట్ల డాలర్ల ఆర్థిక నష్టాన్ని కలిగించినట్లు ‘నేచర్‌’లో ప్రచురితమైన ఓ అధ్యయనం విశ్లేషించింది. భూతాప నియంత్రణకు ప్రపంచ దేశాలు కుదుర్చుకున్న ‘పారిస్‌ ఒడంబడిక’ నుంచి వైదొలగిన అమెరికా- ఇప్పుడు అంతర్జాతీయ…