Seethakka: రిజర్వాయర్లలో నీటి నిల్వలపై నిరంతర పర్యవేక్షణ ఉండాలి: సీతక్క

హైదరాబాద్‌: వర్షపు నీరు భూగర్భంలోకి ఇంకేలా చర్యలు తీసుకోవాలని మంత్రి సీతక్క (Seethakka) అధికారులను ఆదేశించారు. ఇంకుడు గుంతలు, మ్యాజిక్‌ పిట్ల నిర్మాణాలు రెండు రోజుల్లో పూర్తి చేయాలన్నారు. ఎల్‌నినో, నీటి పొదుపుపై గ్రామస్థాయిలో ప్రజలకు అవగాహన కల్పించాలని దిశానిర్దేశం చేశారు. గ్రామీణ తాగునీటి సరఫరా ఇంజినీర్లతో సీతక్క శనివారం టెలికాన్ఫరెన్స్‌ నిర్వహించారు. ఎల్‌నినో నేపథ్యంలో సింగూరు ప్రత్యామ్నాయ తాగునీటి అవసరాలకు రూ.120 కోట్లు మంజూరు చేసినట్లు చెప్పారు.

సంగారెడ్డి, మెదక్‌, కామారెడ్డి, నిజామాబాద్‌ జిల్లాలకు ప్రత్యేక నిధులు కేటాయించామని, ఇతర జిల్లాల్లో తక్షణ తాగునీటి అవసరాలకు రూ. కోటి చొప్పున నిధులు వెచ్చించామని చెప్పారు. తాగునీటి సరఫరాలో అంతరాయం లేకుండా ప్రత్యామ్నాయ ఏర్పాట్లు చేయాలని అధికారులను ఆదేశించారు. నీటి ఎద్దటి ప్రాంతాల్లో ట్యాంకర్ల ద్వారా సరఫరాకు ఏర్పాట్లు చేయాలన్నారు. చేతిపంపులు, బావులు, స్థానిక నీటి వనరులను అందుబాటులో ఉంచాలని, రిజర్వాయర్లలో నీటి నిల్వలపై నిరంతర పర్యవేక్షణ చేపట్టాలని సూచించారు.