స్పెయిన్ రైలు ప్రమాదంపై భగ్గుమన్న ప్రజలు.. ప్రధాని రాజీనామాకు డిమాండ్!

మాడ్రిడ్: స్పెయిన్​లో హైస్పీడ్​ రైలు ప్రమాద ఘటనపై ప్రజల నుంచి తీవ్ర వ్యతిరేకత వ్యక్తం అవుతోంది. వేలాది మంది వీధుల్లోకి వచ్చి ఆందోళన చేపట్టారు. ప్రధాని పెడ్రో సాంచెజ్, రవాణా మంత్రి ఆస్కార్ పుయెంటే తమ పదవులకు రాజీనామా చేయాలని డిమాండ్ చేశారు. రాజధానిలోని స్పానిష్ రవాణా మంత్రిత్వ శాఖ భవనం వెలుపల రాత్రికి రాత్రే దాదాపు 1,500 మంది గుమిగూడి మంత్రులు రాజీనామా చేయాలని నినాదాలు చేశారు.

ఈ సందర్భంగా కొందరు నిరసనకారులు భద్రతా సిబ్బందిపైకి బాటిళ్లు విసిరారు. దీంతో పోలీసులు గుంపును చెదరగొట్టేందుకు బాష్పవాయువు ప్రయోగించారు. 'క్రిమినల్స్.. 78 నాటి పాలనా వ్యవస్థను అంతం చేయాలి' అని రాసి ఉన్న బ్యానర్లను ఆందోళనకారులు ప్రదర్శించారు. ఆస్కార్ పుయెంటే.. మృత్యు మంత్రి అంటూ నినాదాలు హోరెత్తించారు. రైల్వే భద్రతకు రక్షణ కల్పిస్తూ రైల్వే డ్రైవర్ల సంఘం ఆధ్వర్యంలో ఇవాళ సమ్మెకు కూడా పిలుపునిచ్చినట్లు అంతర్జాతీయ మీడియా నివేదించింది.