Supreme Court Bench | చెన్నైలో సుప్రీంకోర్టు బెంచ్‌ ఏర్పాటు చేయండి.. ప్రధాని మోదీకి సీఎం విజయ్ లేఖ

చెన్నై: తమిళనాడు రాజధాని చెన్నైలో సుప్రీంకోర్టు బెంచ్‌ ఏర్పాటు చేయాలని సీఎం విజయ్‌ కోరారు. చిరకాలంగా పెండింగ్‌లో ఉన్న ఈ డిమాండ్‌ను అత్యున్నత న్యాయస్థానం దృష్టికి తీసుకువెళ్లాలని కోరుతూ ప్రధాని మోదీకి ఆయన లేఖ రాశారు. (Supreme Court Bench) చెన్నైలో సుప్రీంకోర్టు ధర్మాసనం ఏర్పాటు చేయడం వల్ల తమిళనాడుకే కాకుండా అన్ని దక్షిణ రాష్ట్రాలకూ ప్రయోజనం చేకూరుతుందని, దేశ నిజమైన సమాఖ్య స్వరూపాన్ని ప్రతిబింబిస్తుందని ఆ లేఖలో పేర్కొన్నారు. సుప్రీంకోర్టులో న్యాయం పొందడానికి ఢిల్లీ వరకు ప్రయాణించవలసి వస్తున్న దక్షిణ రాష్ట్రాల ప్రజలు ఎదుర్కొంటున్న భౌగోళిక, ఆర్థిక ఇబ్బందులను ఆయన ప్రస్తావించారు.

కాగా, చెన్నైలో సుప్రీంకోర్టు బెంచ్‌ ఏర్పాటు చేయాలన్న డిమాండ్‌ 1980 నాటిదని సీఎం విజయ్‌ గుర్తు చేశారు. 1862లో స్థాపించిన మద్రాస్ హైకోర్టు, దేశంలోని పురాతన చార్టర్డ్ హైకోర్టులలో ఒకటి అని పేర్కొన్నారు. మద్రాస్ హైకోర్టు బార్ కౌన్సిల్ వృత్తిపరమైన సామర్థ్యాన్ని కూడా హైలైట్ చేశారు. దీంతో దక్షిణ రాష్ట్రాలకు అత్యున్నత న్యాయ సేవల కోసం చెన్నై వ్యూహాత్మకంగా ఉన్నదని వివరించారు.