టపాసులు లేకుండా దీపావళి.. కోహ్లీతో ప్రచారం చేయించండి: సుప్రీంకోర్టు

న్యూఢిల్లీ: దీపావళిని బాణసంచా లేకుండా పర్యావరణహితంగా జరుపుకునేలా ప్రజల్లో అవగాహన కల్పించాలని సుప్రీంకోర్టు ఆదేశించింది. ఈ మేరకు టీమిండియా స్టార్ క్రికెటర్ విరాట్ కోహ్లీ సేవలను వినియోగించుకోవాలని సుప్రీంకోర్టు సూచించింది. ప్రముఖ క్రీడాకారులు, సెలబ్రిటీల ద్వారా ప్రచార కార్యక్రమాలు నిర్వహించాలని అభిప్రాయపడింది.

బాణసంచా కాలుష్యంపై దాఖలైన పిటిషన్లను జస్టిస్ ఎం.ఎం. సుందరేశ్, జస్టిస్ ప్రసన్న బి. వరలే నేతృత్వంలోని ధర్మాసనం విచారించింది. ప్రతి ఏడాది కాలుష్య నియంత్రణకు ఆదేశాలు జారీ చేస్తున్నా ఉల్లంఘనలు కొనసాగుతున్నాయని, దీంతో ఆదేశాలు ఆశించిన ఫలితాలను ఇవ్వడం లేదని వ్యాఖ్యానించింది.