ఉద్యోగుల సుదీర్థ‌ సేవలు సంస్థకు చిరస్మరణీయం : ఎస్ ఓ టు జీఎం ఎం.గోవిందరావు

రుద్రంపూర్, అక్టోబర్ 31 : సింగరేణి సంస్థ ప్రగతిలో ఉద్యోగుల పాత్ర ఎనలేనిదని, సుదీర్ఘ కాలం పాటు క్రమశిక్షణతో విధులు నిర్వర్తించి పదవీ విరమణ పొందుతున్న ఉద్యోగుల సేవలు సంస్థకు చిరస్మరణీయమని కొత్తగూడెం ఏరియా ఎస్ ఓ టు జీఎం ఎం.గోవిందరావు కొనియాడారు. శనివారం స్థానిక జీఎం కార్యాలయంలో పదవీ విరమణ పొందిన ఉద్యోగులకు ఆత్మీయ వీడ్కోలు సభ నిర్వహించారు. పర్సనల్ విభాగంలో డిప్యూటీ సూపరింటెండెంట్ (క్లర్క్)గా విధులు నిర్వర్తించిన కె.శ్రీనివాస్ కుమార్, ఫైనాన్స్ విభాగంలో డిప్యూటీ సూపరింటెండెంట్ (క్లర్క్)గా పనిచేసిన రాణి శనివారంతో పదవీ విరమణ పొందారు.

ఈ సందర్భంగా వారిద్దరినీ ఎస్ ఓ టు జీఎం ఎం. గోవిందరావు శాలువాలు కప్పి, పుష్పగుచ్ఛాలు, జ్ఞాపికలతో ఘనంగా సత్కరించి వీడ్కోలు పలికారు. భావి జీవితాన్ని ఆయురారోగ్యాలతో, సంతోషంగా గడపాలని ఆకాంక్షించారు. ఈ వీడ్కోలు కార్యక్రమంలో డీజీఎం (ఐఈ) ఎన్. యోహన్, పర్సనల్ మేనేజర్ ఎల్. తిరుపతి, డీవైపీఎం జి. హరీష్, సీనియర్ పీఓలు మజ్జి మురళి, బి. రాము, జీఎం ఆఫీస్ పిట్ సెక్రటరీ సిహెచ్. సాగర్, వివిధ విభాగాల అధిపతులు, అధికారులు, జీఎం కార్యాలయ సిబ్బంది పాల్గొని రిటైర్డ్ ఉద్యోగులకు శుభాకాంక్షలు తెలిపారు.