వరి విత్తనాలు అమ్మొద్దు

హైదరాబాద్‌, అక్టోబర్‌ 27 (నమస్తే తెలంగాణ): వరి సాగును నియంత్రించేందుకు ఇప్పటికే రైతుల నుంచి సెల్ఫ్‌ డిక్లరేషన్‌ తీసుకొంటున్న ప్రభుత్వం.. తాజాగా మరో అడుగు ముందుకేసింది. చెట్టు కొమ్మలను కాదు.. చెట్టునే కూకటివేళ్లతో పెకిలించే కుట్రకు తెరతీసింది. అందుకే యాసంగిలో వరి విత్తన విక్రయాలపై అనధికారికంగా బ్యాన్‌ విధించింది. విత్తనాలను విక్రయించొద్దని డీలర్లకు అల్టిమేటం జారీ చేసింది.

ఈ మేరకు జిల్లాల్లో వ్యవసాయ శాఖ అధికారులు విత్తన డీలర్లతో ప్రత్యేకంగా సమావేశాలు పెట్టి మరీ స్పష్టమైన ఆదేశాలిస్తున్నారు. యాసంగిలో ఒక్క గింజ వరి విత్తనాన్ని కూడా విక్రయించొద్దని, ఒకవేళ ప్రభుత్వ ఆదేశాలను ధిక్కరించి విక్రయిస్తే ఆ డీలర్లకు కఠిన చర్యలు తప్పవని హెచ్చరించినట్టు తెలిసింది. అవసరమైతే డీలర్‌ లైసెన్స్‌ను సైతం రద్దు చేస్తామని హుకుం ఇచ్చినట్టు సమాచారం. సర్కార్‌ నిర్ణయంపై డీలర్లు తీవ్ర ఆగ్రహం వ్యక్తం చేస్తున్నారు. రైతులు విత్తనాల కోసం వస్తే విక్రయించకుండా ఎలా ఉంటామని ప్రశ్నిస్తున్నారు. రైతులకు పంట పండించే స్వేచ్ఛ లేదా అంటూ ప్రశ్నిస్తుండడం గమనార్హం.