‘విద్వేష’ బిల్లును వెనక్కి తీసుకోవాలి.. ఇప్పటికే దేశంలో కఠిన చట్టాలు ఉన్నాయి

హైదరాబాద్‌, అక్టోబర్‌ 26 (నమస్తే తెలంగాణ) : రాష్ట్ర ప్రభుత్వం ప్రతిపాదించిన ‘తెలంగాణ ద్వేషపూరిత ప్రసంగాలు, ద్వేషపూరిత నేరాల (నిరోధక) బిల్లు, 2026’ను ఉపసంహరించుకోవాలని బీఆర్‌ఎస్‌ డిమాండ్‌ చేసింది. ఈ మేరకు బీఆర్‌ఎస్‌ ప్రధానకార్యదర్శి సోమా భరత్‌కుమార్‌ సోమవారం శాసనసభ సెలెక్ట్‌ కమిటీ చైర్మన్‌కు 11 పేజీల వినతిపత్రాన్ని సమర్పించారు. ఈ బిల్లు ప్రస్తుత రూపంలో రాజ్యాంగ విరుద్ధంగా ఉన్నదని తెలిపారు. బిల్లు భారత రాజ్యాంగంలోని ఆర్టికల్‌ 14 (సమానత్వ హకు), ఆర్టికల్‌ 19(1) (ఏ) (భావప్రకటన, పత్రికా స్వేచ్ఛ), ఆర్టికల్‌ 21 (వ్యక్తిగత స్వేచ్ఛ)ను తీవ్రంగా ఉల్లంఘిస్తున్నదని బీఆర్‌ఎస్‌ పేరొన్నది.

ద్వేషపూరిత ప్రసంగాలను అరికట్టడానికి దేశంలో ఇప్పటికే భారతీయ న్యాయ సంహిత (బీఎన్‌ఎస్‌)లోని సెక్షన్లు 196, 197, 299, 302, 353తోపాటు ఇన్‌ఫర్మేషన్‌ టెక్నాలజీ చట్టం-2000, తెహసీన్‌ పూనావాలా (2018) కేసులో సుప్రీంకోర్టు ఆదేశాలు అమల్లో ఉన్నాయని బీఆర్‌ఎస్‌ స్పష్టం చేసింది. లోపం చట్టాల్లో లేదని, అమలు చేయడంలోనే ఉన్నదని ప్రవాసీ భలై సంఘటన్‌ కేసులో సుప్రీంకోర్టు చెప్పిన విషయాన్ని గుర్తుచేసింది. సమగ్ర పార్లమెంటరీ పరిశీలన తర్వాత వచ్చిన కేంద్ర చట్టాలను తోసిరాజని, రాష్ట్రస్థాయిలో సమాంతరంగా మరింత కఠినమైన చట్టాన్ని తీసుకురావడం అనవసరమని పేర్కొన్నది.