యూరప్‌ను కుదిపేస్తున్న నిరసనలు

రోమ్‌: యూరప్‌లో నిరసనలు, హింసాత్మక ఘటనలు కలకలం సృష్టిస్తున్నాయి. గత వారం జరిగిన ఘర్షణలు, దుకాణాలపై దాడులు, దోపిడీలు పునరావృతం కాకుండా ఇటలీ అధికారులు భారీగా పోలీసులును, సైనికులను మోహరించారు. శనివారం మిలాన్‌, రోమ్‌, ట్యూరిస్‌ సహా పలు నగరాల్లో వేలాది మంది యువత ర్యాలీలు నిర్వహించారు. మిలాన్‌లో నిరసనలు ప్రశాంతంగా ముగియగా, రోమ్‌, ట్యూరిస్‌ నగరాల్లో పోలీసులకు, ఆందోళనకారులకు మధ్య ఘర్షణలు చోటుచేసుకున్నాయి.

మిలాన్‌లో వేలాది మంది యువకులు రోడ్లపైకి వచ్చి నిరసన తెలిపారు. మరోవైపు సైనికులను మోహరించడంతోపాటు లగ్జరీ దుకాణాలకు అధికారులు రక్షణ చర్యలు చేపట్టారు. గతవారం హింసాత్మక ఘటనల్లో యువత పెద్ద సంఖ్యలో పాల్గొన్నట్టు పోలీసులు గుర్తించారు. దీంతో ప్రధాని జార్జియా మెలోనీ అదనంగా 500 మంది సైనికులను మిలాన్‌కు పంపడంతోపాటు, మైనర్లపై కఠిన చర్యలు తీసుకునేందుకు పలు నిర్ణయాలు ప్రకటించారు. ముందు జాగ్రత్తగా మిలాన్‌లో పలువురు మైనర్లను పోలీసులు అదుపులోకి తీసుకున్నట్టు మీడియా తెలిపింది.