YS Sharmila | బెంగ‌ళూరులోని య‌ల‌హంక ప్యాలెస్ నా బిడ్డ‌ల హ‌క్కు : వైఎస్‌ షర్మిల

YS Sharmila : కర్ణాటక రాజధాని బెంగళూరులోని యలహంక ప్యాలెస్‌ తన బిడ్డల హక్కని ఏపీ కాంగ్రెస్‌ పార్టీ అధ్యక్షురాలు వైఎస్‌ షర్మిల అన్నారు. తన కుమార్తె వివాహానికి సంబంధించి తన సోషల్‌ మీడియా అకౌంట్‌ ఎక్స్‌ వేదికగా ఆమె కీలక ప్రకటన చేశారు. యలహంక ప్యాలెస్‌ నా తండ్రి తిరిగిన ఇల్లని, అందుకే నా కుమార్తె అక్కడే తన వివాహం చేయాలని కోరిందని పేర్కొన్నారు. సొంత ఇంట్లో వివాహం చేయడం తల్లిదండ్రుల అదృష్టమని వ్యాఖ్యానించారు.

తన ఇల్లే పెళ్లివేదిక కావాలన్న బిడ్డ ఆకాంక్షను నెరవేర్చలేకపోయామని తాము బాధపడుతున్నామని షర్మిల ఆవేదన వ్యక్తంచేశారు. నా కుమార్తె అంజలి వివాహం వివాదం లేకుండా జరిపించాల్సిన బాధ్యత నాపై ఉన్నదని అన్నారు. వివాదం దృష్ట్యా యలహంక ఇంట్లో కాకుండా వేరేచోట నా కుమార్తె వివాహం చేయాలని నిర్ణయించామని చెప్పారు. నాది కాని దాని కోసం ఆశపడే నీచత్వం తనది కాదని అన్నారు. జగన్‌ సీఎం అయ్యేవరకు యలహంక ప్రాపర్టీ ఉమ్మడిగా ఉందని, ఆస్తుల పంపకాల్లో యలహంక వందశాతం తనకు, తన పిల్లల భాగానికి వచ్చిందనేది దేవుడి సాక్షిగా నిజమని షర్మిల ఎక్స్‌లో పోస్టు చేశారు.