ఎందుకు రాయాలి?

మీరు చివరిసారిగా ఏదైనా చేతితో రాసి ఎన్నాళ్లయింది? ఎవరికైనా ఏదైనా విషయం చెప్పాలంటే టైప్‌డ్‌ మెసేజ్, దానికీ ఓపిక లేదంటే వాయిస్‌ మెసేజ్‌ పంపిస్తున్నాం. అన్ని సౌకర్యాలు ఉన్న ఈ కాలంలో కూడా చేతితో రాయాల్సిన అవసరమేంటీ అంటారా..? మనిషి మెదడులో ప్రతి క్షణం ఎన్నో ఆలోచనలు పుడుతూనే ఉంటాయి. మొదట వచ్చిన ఆలోచన ఒక రూపం దాల్చకముందే మరొకటి వచ్చి దాన్ని చెదరగొడుతుంది. ఫలితంగా ఎన్నో విలువైన ఆలోచనలు మనసులోనే సమాధి అవుతుంటాయి. మన వ్యక్తిత్వాన్ని బేరీజు వేసుకోవాలన్నా, లోటుపాట్లను గుర్తించాలన్నా, భవిష్యత్తు లక్ష్యాలను నిర్దేశించుకోవాలన్నా- ఆలోచనలకు ఒక సమగ్ర రూపం ఇవ్వాల్సిన అవసరం ఉంది.

పెన్ను కాగితాన్ని తాకిన క్షణం నుంచే ఒక ఆసక్తికరమైన ప్రక్రియ మొదలవుతుంది. మెదడు ఆలోచిస్తుంది. ఆలోచన ఒక రూపాన్ని సంతరించుకుంటుంది. ఆ భావం వేళ్ల కొసలకు చేరి, అక్షరాల రూపంలో కాగితంపై ప్రవహిస్తుంది. మన ఆలోచనలన్నింటినీ ఒకేసారి సమగ్రంగా రాయలేకపోవచ్చు. కానీ రాస్తూ పోతే ఆలోచనకు స్పష్టత, పరిణతి వస్తుంది. రోజుకు పది నిమిషాలు... ఆ రోజు మనసులో మెదిలిన ఒక ఆలోచన, ఎదురైన అనుభవం, చేయాలనుకున్న పని, మనకు మనమే వేసుకున్న ఒక ప్రశ్న ఏదైనా కావచ్చు, రాయాలి. కొంతకాలం తర్వాత ఆ పాత పేజీలను చదివితే ఎన్నో విషయాలు మనకే వింతగా కనిపిస్తాయి. ఎక్కడ తొందరపడ్డామో, ఎక్కడ భావోద్వేగానికి లోనయ్యామో, ఎక్కడ సరైన నిర్ణయం తీసుకున్నామో…