మళ్లీ చదువులబాటలోకి చెంచు యువతి

అచ్చంపేట, నవంబర్‌ 6: చెంచు యువతి మళ్లీ చదువులబాట పట్టనున్నది. చదువుకోవాలనే ఆశ ఉన్నా.. పేదరికం వెంటాడింది.. డాక్టర్‌ కావాలనే కల ఉన్నా.. కార్పొరేట్‌ కళాశాల యాజమాన్యం వైఖరి అడ్డంకిగా మారింది. చివరికి చేతిలో సర్టిఫికెట్లు లేక ఉన్నత చదువులకు దూరమై అడవిబాట పట్టిన ఓ చెంచు యువతి దీనస్థితిని వివరిస్తూ ఈ నెల ఒకటో తేదీన ‘నమస్తే తెలంగాణ’ మెయిన్‌ పేజీలో ‘అడవిగాచిన వెన్నెల.. కార్పొరేట్‌ కక్కుర్తికి చెదిరిన చెంచుబాలిక కల’ శీర్షికన ప్రత్యేక కథనం ప్రచురితమైంది. ఈ కథనం అధికారుల దృష్టిని ఆకర్షించింది. దీంతో కలెక్టరేట్‌, గిరిజిన సంక్షేమశాఖ, ఐటీడీఏతోపాటు ఇతర శాఖల అధికారులు స్పందించారు.

నల్లమల అటవీ ప్రాంతంలోని అమ్రాబాద్‌ మండలం కొమ్మన్‌పేంట చెంచు గ్రామానికి చెందిన ఆర్తి వెంకటలక్ష్మి హైదరాబాద్‌లోని ఆర్టీడీ సంస్థ సహకారంతో పీర్జాదిగూడలోని ఓ కార్పొరేట్‌ కళాశాలలో ఇంటర్‌ బైపీసీ పూర్తి చేసింది. అనంతరం ఉన్నత చదువుల కోసం ఒరిజినల్‌ సర్టిఫికెట్లు కావాలని సదరు కళాశాల యాజమాన్యాన్ని ఆశ్రయించింది. అదనపు ఫీజు బకాయిలు ఉన్నాయంటూ యాజమాన్యం సర్టిఫికెట్లు ఇచ్చేందుకు నిరాకరించింది. తీవ్ర పేదరికంలో ఉన్న వెంకటలక్ష్మి ఆ బకాయిలు చెల్లించలేని పరిస్థితిలో ఉండటంతో ఎన్నిసార్లు వేడుకున్నా ఫలితం లేకుండాపోయింది.