మంచి - చెడు

ఏది మంచి? ఏది చెడు? ఈ ప్రశ్నకు నిర్ద్వంద్వంగా జవాబు చెప్పవచ్చు. దయ, నిజాయతీ, నైతికత, న్యాయార్జన, నిబద్ధత, సమాజ శ్రేయస్సును కోరడం- మంచితనం. అది సంఘంలో శాంతిని, సంతోషాన్ని పెంపొందిస్తుంది. ఇందుకు భిన్నంగా సమాజానికి, ప్రకృతికి హాని కలిగించేదేదైనా, అది మనకు మంచి చేసేదైనా సరే, అది చెడే. ఎందుకంటే, మనం సమాజంలో భాగం కాబట్టి. దొంగతనం, మోసం చేయడం, అబద్ధాలాడటం, ఇతరులను హింసించడం వంటివి సర్వకాల సర్వావస్థలలోనూ, సమస్త ప్రపంచంలోనూ అనైతికమైనవే.

పొరుగింటి చెట్టు నుంచి చాటుగా కాయలు, పువ్వులు కోసుకునే తల్లిని చూసిన బిడ్డ దొంగతనం తప్పు కాదనుకునే అవకాశాలున్నాయి. అలాగే, భార్యాబిడ్డలను తరచూ హింసించే తండ్రిని చూస్తూ పెరిగిన పిల్లలను ఆ భయానక అనుభవాలు జీవితాంతం వెంటాడతాయి. చిన్న విషయాలకు కూడా అబద్ధాలాడే తల్లిదండ్రులను చూసిన పిల్లలకు నిజం విలువ అర్థం కాదు. సంపదను పెంచుకోవడం తప్ప పంచుకునే అలవాటు లేని ఇంట్లో పెరిగితే పరోపకారమనేదే తెలియదు. సత్ప్రవర్తన పెంపకంతోనే అలవడుతుంది. అది ఒంటబట్టాలంటే, మంచితనం అనే మూలబీజం పసితనంలోనే నాటాలి. ‘మంచి’ అనేది దివ్యౌషధం. దాన్ని సేవించిన వాడికి ఆత్మతృప్తి ఉంటుంది. మంచితనం మనిషి శోభను పెంచే అమూల్యమైన ఆభరణం. మంచి…