ప్రజలు, రైతులు అప్రమత్తంగా ఉండాలి: జిల్లా కలెక్టర్‌

ఖమ్మం: బంగాళాఖాతంలో ఏర్పడిన అల్పపీడనం తుపాను మారే అవకాశం ఉందని వాతావరణశాఖ పేర్కొన్న నేపథ్యంలో ఖమ్మం జిల్లాలో రానున్న మూడు రోజుల పాటు వర్షాలు కురిసే అవకాశం ఉందని, ప్రజలు, రైతులు అప్రమత్తంగా ఉండాలని జిల్లా కలెక్టర్ దివాకర టీఎస్‌ హెచ్చరించారు. అక్టోబర్ 28న జిల్లాలో భారీ నుంచి అతి భారీ వర్షాలతో పాటు అత్యంత భారీ వర్షాలు కురిసే అవకాశం ఉందని, గంటకు 50 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉన్నట్లు వాతావరణ శాఖ హెచ్చరించిందని పేర్కొన్నారు.

ఉరుములు, మెరుపులు సంభవించే సమయంలో ప్రజలు బహిరంగ ప్రదేశాల్లో, చెట్ల కింద, విద్యుత్ స్తంభాల సమీపంలో ఉండకూడదని కలెక్టర్ సూచించారు. జిల్లాలోని సంబంధిత శాఖల అధికారులు వాతావరణ పరిస్థితులను ఎప్పటికప్పుడు పర్యవేక్షిస్తూ అవసరమైన ముందు జాగ్రత్త చర్యలు తీసుకోవాలని సూచించారు. వాతావరణ శాఖ హెచ్చరికలు, జిల్లా యంత్రాంగం జారీ చేసే సూచనలను ప్రజలు, రైతులు తప్పనిసరిగా పాటించాలని కలెక్టర్‌ పేర్కొన్నారు.