రాహుల్ మార్చ్‎కు నో పర్మిషన్.. లాస్ట్ మినిట్‎లో ఢిల్లీ పోలీసుల ట్విస్ట్

న్యూఢిల్లీ: ఇండియా కూటమి నవంబర్ 1న రాంలీలా మైదాన్‎లో నిర్వహించ తలపెట్టిన భారీ బహిరంగ సభకు ఢిల్లీ పోలీసులు గ్రీన్ సిగ్నల్ ఇచ్చారు. అయితే, కాంగ్రెస్ అగ్రనేత రాహుల్ గాంధీ కన్నాట్ ప్లేస్ నుంచి చేపట్టాలనుకున్న యాత్రకు మాత్రం పోలీసులు అనుమతి నిరాకరించారు. రాహుల్ గాంధీ పాదయాత్రకు సంబంధించి ఎలాంటి దరఖాస్తు అందలేదని తెలిపారు. శాంతి భద్రతల సమస్యలు, పండుగ సీజన్ నేపథ్యంలో కన్నాట్ ప్లేస్‎లో రాహుల్ మార్చ్‎కు అనుమతి ఇవ్వలేమని తేల్చిచెప్పారు.

నవంబర్ 1న రామ్‌లీలా మైదాన్‌లో భారత కూటమి నిర్వహించనున్న భారీ ర్యాలీకి ముందుగా ఢిల్లీలో జరిగే మార్చ్‌లో పాల్గొనాల్సిందిగా రాహుల్ గాంధీ ప్రజలకు పిలుపునిచ్చారు. ఆదివారం మధ్యాహ్నం 12 గంటలకు కన్నాట్ ప్లేస్ సమీపంలోని మింటో రోడ్ జంక్షన్ నుంచి ప్రారంభం కానున్న ఈ యాత్ర అజ్మేరీ గేట్ గుండా వెళ్లి రామ్‌లీలా మైదాన్‌లో ముగుస్తుంది. ఈ యాత్రలో తనతో కలిసి నడవాలని రాహుల్ కోరారు. అయితే, కన్నాట్ ప్లేస్‏లో రాహల్ యాత్రకు ఢిల్లీ పోలీసులు అనుమతి నిరాకరించారు.