సారా తయారీ కేంద్రాలపై అధికారుల మెరుపు దాడులు

పర్లాఖెముండి: అక్రమంగా నాటు తయారు చేస్తున్న కేంద్రాలపై పోలీసులు, రెవెన్యూ అధికారులు సంయుక్తంగా ఆదివారం మెరుపు దాడులు చేశారు. కాశీనగర్ సమితి కే సీతాపురం పంచాయతీ పరిధిలోని సింగిపురం గ్రామంలో అక్రమంగా సారా తయారీ చేపడుతున్న 15 కేంద్రాలపై దాడులు చేసినట్లు గజపతి జిల్లా పర్లాఖెముండి పట్టణ ఆదర్శ ఠాణా అధికారి ప్రశాంత్ భూపతి తెలిపారు. ముఖ్యంగా పలువురి ఇళ్ల పెరట్లో, స్థానిక వ్యవసాయ భూముల సమీపాల్లో సారాను గుర్తించి ధ్వంసం చేసినట్లు వివరించారు. ఈ ఘటనకు సంబంధించి 15 మంది నిందితులను, వారి అనుచరులను అరెస్టు చేసినట్లు, దర్యాప్తు కొనసాగుతుందని తెలిపారు.

నవరంగపూర్: నవరంగపూర్ జిల్లా ఉమ్మర్ కోట్ సమితిలోని ఓ ప్రైవేటు పాఠశాలకు చెందిన బస్సులో అకస్మాత్తుగా మంటలు చెలరేగాయి. గమనించిన స్థానికులు వెంటనే అగ్నిమాపక సిబ్బందికి సమాచారం అందించారు. ఘటనాస్థలికి చేరుకున్న అధికారులు ఫైర్‌ ఇంజిన్ సాయంతో మంటలను అదుపులోకి తీసుకొచ్చారు. ప్రమాదం జరిగిన సమయంలో బస్సులో ఎవరూ లేకపోవడంతో పెను ప్రమాదం తప్పింది. బస్సులో మంటలు ఎలా వ్యాపించాయనే కోణంలో పోలీసులు దర్యాప్తు చేపట్టారు.