ఈఎస్‌ఐ దవాఖానపై ఎంపీ వంశీ అబద్ధాలు

పెద్దపల్లి, నవంబర్‌ 5 (నమస్తే తెలంగాణ): ఆ కుటుంబం పెద్దపల్లి పార్లమెంట్‌ నియోజకవర్గం పేరు తలువని రోజుండదు. గడ్డం వెంకటస్వామి, గడ్డం వివేక్‌ను దశాబ్దకాలంగా ఆదరిస్తూ.. గత ఎన్నికల్లో వివేక్‌ తనయుడు గడ్డం వంశీకృష్ణకు ఇక్కడి ప్రజలు పట్టంగట్టారు. ఈ పార్లమెంట్‌ పరిధిలో ఉన్న రామగుండం అసెంబ్లీ సెగ్మెంట్‌లోని కార్మికులపై ఆ కుటుంబానికి ఉన్న నిర్లక్ష్యానికి ఈఎస్‌ఐ దవాఖాన ఘటన నిదర్శనంగా నిలుస్తున్నది.

రామగుండంలో చాలా ఏండ్ల క్రితం నిర్మించిన ఈఎస్‌ఐ దవాఖాన శిథిలావస్థకు చేరగా, దాని స్థానంలో నూతన దవాఖాన కోసం బీఆర్‌ఎస్‌ హయాంలో అప్పటి రామగుండం ఎమ్మెల్యే కోరుకంటి చందర్‌, కలెక్టర్‌ సంగీత సత్యనారాయణ వరుస లేఖలతో అప్పటి కార్మిక మంత్రి, ప్రస్తుత మేడ్చల్‌ ఎమ్మెల్యే మల్లారెడ్డి పూర్వపు దవాఖాన ప్రాంగణంలోనే కొత్తది నిర్మించాలని నిర్ణయిచి భూకేటాయింపులు చేశారు. అనంతరం కాంగ్రెస్‌ ప్రభుత్వం రాగా.. ఈఎస్‌ఐ దవాఖానకు భూకేటాయింపు జరుగలేదని, ప్రస్తుత కార్మిక మంత్రి వివేక్‌, ఎంపీ వంశీకృష్ణ కలెక్టర్‌ కోయ శ్రీహర్షపై నిందలు మోపి జగన్నాటకానికి తెర తీశారు.