man kills live-in partner’s dogs | బ్రేకప్‌ చెప్పిందని.. సహజీవనం చేసిన మహిళ పెంపుడు కుక్కలను చంపిన వ్యక్తి

కోల్‌కతా: సహజీవనం చేసిన మహిళ బ్రేకప్‌ చెప్పడంతో ఒక వ్యక్తి దారుణానికి పాల్పడ్డాడు. ఆమె పెంపుడు కుక్కలను క్రూరంగా చంపాడు. ఆ మహిళకు వీడియో కాల్‌ చేసి దీనిని చూపించాడు. ఈ నేపథ్యంలో ఆ వ్యక్తిని పోలీసులు అరెస్ట్‌ చేశారు. (man kills live-in partner’s dogs) పశ్చిమ బెంగాల్‌ రాజధాని కోల్‌కతాలో ఈ సంఘటన జరిగింది. సంజీబ్ భట్టాచార్య, హిమాచల్‌ ప్రదేశ్‌కు చెందిన పరి నోవా కలిసి సహజీవనం చేశారు. దక్షిణ కోల్‌కతాలోని విక్రమ్‌గఢ్ ప్రాంతంలో ఒక అద్దె ఇంట్లో వారిద్దరూ నివసించారు. అయితే సంజీబ్‌ వేధిస్తుండటంతో భరించలేని పరి నోవా అతడికి బ్రేకప్‌ చెప్పింది. ఆ ఇంటిని ఆమె వీడింది.

కాగా, నవంబర్‌ 14న పరి నోవాకు చెందిన రెండు పెంపుడు కుక్కలను సంజీబ్ భట్టాచార్య దారుణంగా చంపాడు. ఆమెకు అతడు వీడియో కాల్‌ చేశాడు. ఉరికి వేలాడిన ఒక పెంపుడు కుక్కను చూపించాడు. ఆందోళన చెందిన పరి నోవా వెంటనే స్థానిక వ్యక్తికి ఫోన్‌ చేసింది. ఆ ఫ్లాట్‌కు వెళ్లి చూడమని కోరింది. ఆ వ్యక్తి ఫ్లాట్‌కు చేరుకోగా రెండు పెంపుడు కుక్కలు చనిపోయి ఉన్నాయి. ఆ ఫ్లాట్‌ అంతటా రక్తపు మరకలు ఉన్నాయి. ఈ సమాచారం తెలుసుకున్న పోలీసులు సంజీబ్‌ను అరెస్ట్‌ చేశారు.