హైదరాబాద్ లో మంటలు..నిప్పు రవ్వలు పడి దాదాపు పది చోట్ల అగ్ని ప్రమాదాలు..

దీపావళి పండుగ వేళ భాగ్యనగరాన్ని అగ్నికీలలు చుట్టుముట్టాయి. సంబురంగా కాల్సిన పటాకుల నిప్పురవ్వలు పడి నగరవ్యాప్తంగా పదికి పైగా ప్రాంతాల్లో అగ్నిప్రమాదాలు సంభవించాయి. ఈ ఘటనల్లో భారీగా ఆస్తినష్టం వాటిల్లింది. పుత్లిబౌలిలో ఏసీలు, కంప్రెషర్లు బుగ్గి కాగా, చేవెళ్లలో పాత పట్వారీ ఆఫీసులో రికార్డులు కాలిపోయాయి. నాలుగైదు చోట్ల గోదాముల్లోని వస్తువులు అగ్నికి ఆహుతయ్యాయి. ముషీరాబాద్​లో పది టూ వీటర్లు కాలిపోయాయి. ఓ చోట మెడికల్​షాపు, ఇంకోచోట కిరాణా షాపు, రెండు చోట్ల పటాకుల షాపుల్లోనూ మంటలు చెలరేగాయి. అయితే, ఎక్కడా ప్రాణనష్టం జరగకలేదు.

గోషామహల్ : రాకెట్లు పేల్చడంతో తారాజువ్వలు రెండంతస్తుల బిల్డింగుపై పడి అఫ్జల్‌గంజ్‌ పీఎస్​పరిధిలోని పుత్లిబౌలి చౌరస్తా సమీపంలోని ఓ బిల్డింగు గోదాంలో మంటలు వ్యాపించాయి. ఈ ఘటనలో రిఫ్రిజిరేటర్లు, ఏసీల కంప్రెసర్లు పేలిపోయాయి. ఈ ఘటనతో స్థానికులు ఇండ్ల నుంచి పరుగులు తీశారు. సమాచారం ఇచ్చిన అరగంట తర్వాత ఫైర్ ​వెహికల్​రావడంతో జరగాల్సిన నష్టం జరిగిపోయింది.