కేసీఆర్‌ పాలనలో రైతులది రాజభోగం

నిర్మల్‌, నవంబర్‌ 6 (నమస్తే తెలంగాణ): తెలంగాణ తొలి సీఎం కేసీఆర్‌ ప్రభుత్వ హయాంలో రైతు రాజులా బతికితే.. గత మూడేండ్ల కాంగ్రెస్‌ పాలనలో అన్నదాత అడుగడుగునా ఇబ్బందులు ఎదుర్కొంటున్నాడని మాజీ మంత్రి వేముల ప్రశాంత్‌రెడ్డి పేర్కొన్నారు. నిర్మల్‌ జిల్లా కేంద్రంలోని ఎన్టీఆర్‌ మినీ స్టేడియంలో ఈ నెల 11న నిర్వహించనున్న బీఆర్‌ఎస్‌ రైతు గర్జన మహాసభకు పార్టీ రాష్ట్ర వర్కింగ్‌ ప్రెసిడెంట్‌ కేటీఆర్‌ హాజరుకానున్న నేపథ్యంలో శుక్రవారం జిల్లా కేంద్రంలోని బీఆర్‌ఎస్‌ కార్యాలయంలో పోస్టర్లను ఆవిష్కరించారు.

ముఖ్య అతిథిగా హాజరైన మాజీ మంత్రి వేముల ప్రశాంత్‌రెడ్డి మాట్లాడుతూ.. బీఆర్‌ఎస్‌ హయాంలో 24 గంటల విద్యుత్తు, ఎరువులు, సాగునీరు అందుబాటులో ఉండేవని, ప్రస్తుత కాంగ్రెస్‌ హయాం లో యూరియా కోసం రైతులు చెప్పులు, పాస్‌బుక్కులు క్యూలో పెట్టుకొని పడిగాపులు కాయాల్సిన పరిస్థితి నెలకొన్నదని చెప్పారు. ప్రపంచమంతా కరువు వచ్చినా తెలంగాణలో మాత్రం రావొద్దన్న దూరదృష్టితో కేసీఆర్‌ కాళేశ్వరం ప్రాజెక్టును నిర్మించారని, అలాంటి ప్రాజెక్టు నుంచి నీటిని ఎత్తిపోయకుండా కాంగ్రెస్‌ ప్రభుత్వం కుట్రలు చేస్తున్నదని ఆరోపించారు.